Maanasada: DAREEN SHACAB

Maanasada: DAREEN SHACAB

Maansada DAREEN SHACAB  waa tix kooban, oo si fog u falanqaynaysa ama uga faalloonaysa xaaladda guud ee waddanku marayo, qooraansi wixii la soo maray iyo siiyaalka waxa na sugayana aan ka marnayn.

Waa maanso, maleyn iyo ka dheer waxay ila tahay, maxaa yeelay qodobbada ay cuskan tahay ayaa ah xog iyo xaajo warran, si aan loo marin hilinno hore loogu hungoobay, kama marna hubsiimo ka dheer hadaaq iyo hantaatac. Sidaa awgeed, waa ma hurto in qof walba intii awooddiisa ka hadlo, kana gaysto ayaaha umadda, ugu dambayn, aan idiin kala boxo idinka iyo maansada:

Maanasada: DAREEN SHACAB

Shiinleey haddaan furay

Weydiimo shaaciyey

Shaacirkana farriimiyo

Gaarsiiyey sheekada

Baaq nabadda shaafiya

Sheeg sheegay oo diray

Ama sheer gareeyeyoo

SHURUGDIIDNA [1] daabacay

Kala shiray dadweynaha

Shaqi lama horboodoo

Dadka lama shareeyee

Sha’da gabayga maansiyo

Shiinlayda heestuba

Shumac weeye kaah iyo

Shamsa aad ku hiratoo

Shuxshux iyo ka dheer been

Oo dareenka Shacabkiyo

Shabbaddii sinnaantiyo

Sama shaacinaysee.

Ninka shiishku haystee

Sheekadu ku socotoow

Haddaan shicir ku iri waa:

Ninka sharraxanoow, joog


Shabshablaha socdoow, joog 


Sheekh Camaamadlow, joog


Oday Shaarubloow, joog


Shayb madax cadoow, joog


Shaqaaqada wadow, joog


Shibbanaha xarafaha iyo


Shaqallada dhigoow, joog


Shafka ha u garaacine


Shurug yuu ku raacine


How Shareera tumanine


Shirbaa Laashinoow, joog


Shiinleey tirshoow joog


Shiidaal sanoow, jog!”[2]

Inta sheeggan mooyee

Inta sheelan baa badan

Shaxdan aan tilmaamee

Ninba shaar u gaar yahay 

Isku sheego wiil shidan

Qof shaahidayna uu jirin

Inaan shabiyo maan rabin

Inaan shiriyo maan rabin

Inaan shawr wadaagnana

Shaqadayga ma ahayn!

Shacab yaan farfiiqoo

Shaxda hoose ee dedan 

Ugu sheegay Shiribkoo

Shilalkii daboolnaa

Iyo dabinkii sheelnaa

Yaa shuufa yiriyoo

Yaa shalalshay Aadmiga?.

Sha’da kale waxay tahey

Jabkii shalay na gaariyo

Dabkii nagu shidnaabaa

Lagu shubay basbaasoo

Dadku sheelka ma arkoo

Shafka nabadda uma tumo!

In la shiilo Doofaar

Cadaab lagu shaqiiqiyo

Waa shucuur la’aantee

Shibil baa na soo maray 

Musuq buu Shanshada dhigay!

Militari shaf weynbaa

Ku shuuqiyey awood adag

Shib inaan niraahniyo

Dadka oo shamuuqliyo

Shabaqluu ku caan baxay!

Shufto iyo Jabhado baa

Dabadeed shaqaaqiyo

Shiddo kale la daahiray!

Shawtali gar dhuubloo

Abuu iyo la baxay Sheekh

Wadaadnimo ku shaaximan 

Sharci iyo la yimid belo

Shareecana ku shaakiley!

Kii Shahaado haystana

Shisheeyuu la ehelyahay

Diintiisu waa Shilin

Damiirkiisu waa shuhub

Shaqshaq aan wax celinayn

Intaasoo shar iyo hoog

Ku shuraako noqotaa

Shacabkani arkeenoo

Shoocad kalena way sugi.

Haddaan shalay la raacdayn

Haddaan maanta loo shirin

Haddaan shaahid loo noqon

Haddaan shuhubka laga bixin

Haddaan shuuqda laga dayn

Haddaan shamaareerkiyo

Shawahaadda laga dayn

Shaqaaqadani way socon.

Ninka diday shafkiisoo

Biyo shuluq ka yiri iyo

Shanqar aan cid kale maqal

Shuush mooday oo kale

Dadkeenii ma kala shiray?.

Inaan shalay dhantaallayn

Midnimana la sheegeeyn

Shantii beri naloo dhigay

Marna aan shir lagu arag

Isku sheegi maynee

Belodaan la shubayee

FEDERAL ku sheeggani

Weli muusan shaacine

Shaxdan yaa inoo dhigay?.

Shacab uma codeynoo

Shawr laguma gaarine

Shaarkan yaa inoo tolay?.

Inta maamul sheeggane

Dawlado la shaaciyey

Mid ammaan la sheegiyo

Sharaf gaarle lama maqal!

Inta Shaalka wadatiyo

Barfasor shahaado leh

Sharciyada yaqaaniyo

Sheekha Diinta faafiya

Giddi markii ay shawreen

FEDERALkii shiileen

Sharraxeen ujeeddada

Shaxdoodii waxay tiri

Shiddo iyo dhib weeyaan;  

Shan boqoloo ra’iisoo

Midba sheegto keligii

Inuu Shiikha Beledkiyo

Baashaha shirkaba yahay!

Shiddadii dorraad iyo

Shan labaatan lagu daray

Na haraysay Shiikhoow

Shuush iyo yurayn iyo 

Shurugoow bax maahee 

shacabkoo heshiiyiyo

Shaahidkoo arxama oo

Noo shafeeca mooyee 

Shaqaaqadani way socon.

Shulug weynta Qaacida

Rag Shukooyin qaatoo

Indhahana Shareertoo

Shiishaan la haystoo

Shaam laga hagaayoo

Shayb iyo Dhallaan iyo

Dumar aan ka shiixayn

intan shiikhakh weeyaan

Ama waa Shariifiin

Shacabkeennu leeyahay

Shaqaaqadani way socon.

Shabaabkaan na shidayee

Shanshadii na jabiyee

Shamiiqsanaya dhiiggee 

Shaqalladii Quraankiyo

Diintaba shakaalee 

Xadiisyada shareeyee 

Say rabeen u sheegaan

intay shacabka qaarkood

Shuhaddada u haystaan

Shaqaaqadani way socon.

Haddii aad Shabeelliyo

Shangaanida ku taal Xamar

Shalaambood xorayseen

Ood Shabaab ka saarteen

Qaran shuuqay oo dumay

Heello iyo Shiribkoo

Shaashadaha laga shido

Ama sheeko baralleey

Shaki kuma ba’aayoo

Nabad shaacin maysee

Sheekada maxaa dheer?.

Shabshablaha afduubka ah

Iyo Shulugyo weyntuba

Waxay shaqal wadaagan

Abeesada sharleeyda ah

Shay qarsoodi kugu dila

Shanqartiis adoon maqal

Sunta uu shug kugu dhaho

Xiddidada sharqamisee

Halbawlaha shidaysee  

Dhiiggaaga shubatee 

Hurgumada shalwinayso

Shanshadaada gelisee

Shiddadeed u dhimataa

Ka metelan Shabaabkuna!

Inaad shoog la qarowdiyo

Shaafinimada kala daa!

Shib inaad ahaatiyo

Shuxhsuxlaynta kala daa!

Shushumawga diidkiyo

Shaxaroor cun kala daa!

Inaad shaqaqaflaysiyo

Shanqar tirasho kala daa!

Inaad sheyb ahaatiyo

Shabaab sheegad kala daa!

Inaad shaamareertiyo

Sharrax tumasho kala daa!

Inaad shuraako doontiyo

Shuqul xumada kala daa!

Qarankii shidnaa beri

Shaqo iyo farsamo iyo

Shirkadiyo wax soo saar 

Shaqaaluhu hormariyeen

Sheeko iyo war mooyee

Shax kalaba kamay harin!

Dhallintu sheeko mooyee

Waligood ma shaahidin

Odayaduna sheeg sheeg

Iyo Shicirro mooyee

Shaqadeeda ma hayaan.

Shaac iyo ileysbaan

Shishe iiga muuqane

Hayga didin Shirbaagoow

Ha sharaysan maansada

Kuma sheegin ceebaal

Wax shucuurta dhaawaca!

Kuma shaacin beeniyo

War shucuubta kala dila!

Waa shifeeya taydiyoo

Hadal sharaf leh weeyaan

Shiinleey xaq sooriyo

Shakal daaris weeyaan.

Bil Shacbaana shaaceed

Sha‘ni gaara weeyaan

Shinni Malabkeed weeyaan

Shilin iyo Gafane iyo

Waa shar iyo xumaan diid!

Dhammaad.

Luulyo, 2012

1,2: “SHURUGDIID” waa maanso aan sanadkii hore (2011) curiyey, oo iyana SHIINLEEY ahayd.

Bashiir M. Xersi

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s