Maansada; QIIRO!
Waxa xigaya qiirada
Qalbigii ogaan kara
Sii qiyaasi jiray baan
Qowmkeey ka waayee
Iga daaya qaylada.
Gu’yaalaha qulqulayee
Qayr iyo xumaanba leh
Bulsho maan qallalano
Waxaan nahay qafiiftoo
Hadba qiiro beenaad
Qasnadaha ka dhaansada.
Wixii qalad la galayee
Qaanuun ku sheegnaa
Sama bixinta qaran iyo
Quraan iyo shareeciyo
Qalinlaha ku daabnaa
Qawmiyadda Soomaal
Maxay ugu qushuucdoo
Caleemaha qoyaanka leh
U lululeen qorshe la’aan?
Maxay qar is ka tuurtoo
Bohol hoos u qodan iyo
Haadaan ku qabaxtiri?.
Qalalaasihii dhacay
Qulub wixii la soo maray
Qabiilladu is dooxeen
Jabhad qayladhaanshiyo
Qabqabluhu adeegsaday
Qaxiyo barakacii dhacay
Qaxootiga la wada galay
War ma laga qabooboo
Ma boogsootey qoontii
Qabyadii ma laga baxay?
Anigoon qilaaf wadin
Qofna aan mucaaradin
Adoon qadaf i gaarsiin
Qarandiidna ii arag
Noo qaabi sheekada
Qunyar soco walaalow.
Qawl aan hubsiimiyo
Qatif laga ilaaleyn
Qormo qalin habawdoo
Qasad iyo lahayn duluc
Maanso qaafka laga dayey
Quraafaadka beentaa
Ninkii qalinka dalabtale
Ku qotomiyey sheekada
Midna qaab ma yeeshe
Iga daaya qiirada
Aan qusayn xaqiiqada.
Qarankeennan dhaawacan
Qatadiyo dhimaalka leh
Qabysanaanta taalliyo
Qoqobnaanta baahdee
Qoys qoyska loo degay
Qandhadii dorraatee
Qamandhacadii geerida
Qalqalkii inagu dhacay
Iyo qaranjabkeennii
Qawadkiyo xumaantii
Qardajeexa loo marey
Qabqab iyo is qaadqaad
Waxaa dhigay qabweynida
Iyo qiiro aan jirin.
Quwaddaada oo bira
Buur qaarar weyn iyo
Waxay qoorta kuu gelin
Mid qabkiisu weynyee
Ha qarrarin xudduudkee
Qunyar soco walaaloow.
Adoo qaybo kala maqan
Qolo qolo u kala go’an
Qabyo tahay midnimadaa
Quwaddaadu weli tahay
Ha qardoofin qarammada
Qibrad badan adeegsoo
Qunyar soco itaalkaa.
Qiirada u kaadsee
Adigoon qalaadayn
Is ku qarinnin uuriyo
Ceeryaamo iyo qiic
Qof walbow waxaan iri;
Qasad yeelo weeyaan
Qoondeena hadafkaa
Hadalkaaga noo qeex
Qodobbee ujeeddada
Waayahaaga qaabeey
Xeel qorsheyso waligaa
Saan qasaare kuu gelin!
Qoobqaadka qayliyo
Qosolkiyo qableyntiyo
Qiyaaliga ka guduboo
Qaxariyo ha gelin ceeb!
Qiso kale waxay tahay
Xaajadaan qallibantaa
Marka qarowga jira iyo
Laga tooso quurada
Qorraxduna dusheenniyo
Is ku qayddo heegada
Gefna aan la qarin karin
Qabandhacada ceebeed
Ninkay qabato yeelkii
Qofkii qiil u raadshoow
Qodqodaha difaacana
Qunyar sii socaan iri
Aad aragtid qodaxdee!
Qoomamiyo shallaay iyo
Qaddar weeye Eebbahay
Adoon qaaq la dhihinoo
La qalaadi shacab yahow
Qunyar soco haddeertaan.
Mahmaah qaaliyaa tiri:
Qofkii tuuray qori geed
Qajaftiisa ka ma naxo.
Mahmaah qaaliyaa tiri:
Waxaad maanta qarisaa
Way ku qurunsadaan jeer.
Mahmaah qaaliyaa tiri:
Middi laygu qalayana
Qofna ii ma qarin karo.
Maahmaahahaa qoran
Qasadkaan ka leeyahay
Qolofta iyo diirkiyo
Qobka aan ka qaadee
Qiyaasteydu waxay tahay
Qaarka sare qurxoonaha
Salka qabada ku la jira
Hadduu adiga qabar li’i!
Qalbigaaga garashada
Qoofal iyo qataar iyo
Qunful bira ku soo xiray
Ani i ma qatali karo!
Aqristaha qoraalkoow
Qawlkeyga maansadu
Hadduu qaafil kula yahay
Qaamuuska dib u baar
Aqri buuggi qadafyada
Qodobbada ku daabacan
Qandhadiyo xanuunka leh.
Dhammaad.
09/02/2017
Bashiir M. Xersi 