Maansada: MOOSHIN!
Malabsade inkaarqaba
Muudsade wixii dehan
Marras aan u nixinoo
Maatada xasuuqoo
Marna laaya gabannada
Aan miciin u fidinoo
Miinada u dhiga’oo
Ama MOOSHIN keenoo
Magaalada qasaayoo
Manfciisa eegtoo
Marfashyada ka qaylshoo
Ku marqaama QAADkoo
Maandooriyaha cuna
Maxaa laga sugaayaa
Maa qoorta laga xiro
Muusiibada fidnada iyo
Lala mooso sharihiis?.
Ninkaan muruqu kaa dhicin
Ku muquunin xooggaa
Sharci meel ma mariyee
Mooryaanta kala dira
Madmadawga duugoo
Inta maahsanoow kaca
Waa laydin mirayee
Iska diida male iyo
Meermeeris badan iyo
Maaweelo beeniyo
Waxaan maanka gali karin!
Mooshinoow maxaad tahay?
Macaashkaa ma dheef baa
Mise waa dhibaal iyo
Dhimaal iyo munaafaqad?
Yaad meherddiis tahay?
Yaa maganta kugu dhaca?
Yaa martida kugu dira?
Yaa masruufka kugu qaba?
Yaa mudane kugu noqon
Adi kugu mudnaan qaba?
Yaa madasha kuu dhiga
Malliiqdaada fadhigiyo
Masallahaaga yaa fura?
Yaa maalka kugu xada?
Yaa maala soofkaa
Kugu miista xooloo
Miisaanka kugu rida?.
Dadku waa madluun dilan
Masaakiin wax haynoo
Midigtood la laaloo
Gacantoodu maran tahay
Shaqo iyo xamaal ma leh
Macaash iyo dulsaar ma leh
Miro iyo abuur ma leh
Mooska beerta lama laha
Mishin iyo farsamo iyo
Makiinado ma yaallaan
Waxaa lagu mashquuliyey
Mooshin aan dhammaanoo
Marso aan dhisaynoo
Machad aan furaynoo
Macne aan samaynoo
Miisaaniyad kabaynoo
Aan hor-mar curin karin.
Inta magacu raacee
Mansab beena haysee
Isu hayta madaxdee
Kuwa maqan ka liitaa
Waa maqane joogee
Haw moodin madax iyo
Inay talo mug weyn iyo
Tusmo ay maleegaan!
Maamule hankii yahay
Adiguun mushaar qora
Mabda’iisu ruug yahay
Macaawinada leexsada
Inta kale mesaal ma leh
Mooro iyo aqool wadin
Maaraynya hagid wadin
Maxaa lagu tilmaamaa?!
Mashaqaan idlaanayn
Mugdi aan iftiin jirin
Muuq sii galbanayiyo
Magac sii tirmaayiyo
Muunaad sii le’eysiyo
Maamuus hallaaboo
Maqalxumo la jaar tahay
Maalmo aan dhammaanayn
Yaa maanta nagu hogan!
Dhammaad.
22/05/2014
Bashiir M. Xersi